Архив: Нәсихәт

  • 0

Ураза тотуның хикмәте.

Рубрика :Нәсихәт

Ураза тотуның хикмәте.

“Бакара” сүрәсенең 183нче аятендә Аллаһ Тагәлә әйтә:

“Ий, мөэминнәр! Сездән әүвәлгеләргә ураза тоту фарыз ителгән кебек, сезгә дә һәр елны бер ай ураза тоту фарыз ителде, бәлки сез тәкъвалылардан булырсыз!”

Димәк, уразаның хикмәте – ул Тәкъвалык. Чөнки Раббыбыз искәртә: “бәлки сез тәкъвалылардан булырсыз!” – ди.

Тәкъвалык – ул Аллаһтан әҗер-савап өмет итеп, Аңа итагать итү (ягъни кушканнарын үтәү) һәм Аның газабыннан куркып, гөнаһлар кылмау (ягъни тыйганнарыннан тыелу).

Габдурахман Сагди, шушы аяткә тәфсир кылып, болай ди:

“Ураза – тәкъвалыкны арттыруга иң нык ярдәм итә торган сәбәп, чөнки бу гыйбадәттә Аңа итагать тә, тыелу да бар. Ураза тоткан кеше, Аллаһның әмерен үтәп, ашау-эчүдән, якынлык кылудан тыелып тора, Аллаһка якынаю нияте белән, Аның әҗерен өмет итеп, бу гамәлне үти – болар барысы да тәкъвалыктан була”.

Шулай ук Пәйгамбәребез (Аллаһның аңа сәламе һәм рәхмәте булсын) бер хәдисендә әйтте:

“Ураза – ул Калкан, ураза тоткан вакытта талашмагыз, начар сүзләр сөйләмәгез, берәрсе сезне сүксә, мин уразада, дип әйтегез”.

Әйе, ураза – ул Калкан, чөнки ураза вакытында кеше гөнаһлардан, начар сүз сөйләүдән, шәһвәтенә иярүдән тыела, саклана. Ә иң мөһиме – җәһәннәм газабыннан, җәһәннәм утыннан саклану өчен иң зур сәбәпләрнең берсе ул.


  • 0

Рубрика :Нәсихәт

Әлхәмдүллиләһ, Раббыбыз Аллаһ Үзенең колларына, кайбер айларыннан аерып, фазыйләткә ия булган айлар биргән. Мөбарәк Рамазан ае да – шул иң фазыйләтле айларның берсе.

Шушы Мөбарәк айда бер-беребез белән изге гамәлләр эшләүдә ярышыйк, кардәшләрем. Хәерле изге гамәлләр кылуда бер-беребезгә ярдәм итик. Раббыбыз тыйган гөнаһлы эшләрдән тыелыйк, тәүбәгә килеп, хәрам эшләрне калдырыйк.

Бу айда Аллаһ Тагәлә кылган изгелекләребезнең әҗерен бик күпкә арттыра.

Кудси хәдистә Аллаһ Тагәлә әйтә:

Адәм баласының һәрбер изге гамәлен уннан алып җиде йөз әҗергә хәтле арттырам, Уразадан башка. Уразаның әҗерен аерым Үзем бирәм, чөнки ул Минем ризалыгымны алыр өчен шәһвәтеннән һәм ризыгыннан тыелып тора” ( Мөслим риваяте).

Кардәшләрем, шушы айны ихластан ураза тотып, төнге намазлар укып, Аллаһның әҗер-савапларын өмет итеп үткәрсәк, Раббыбыз гөнаһларбызны гафу итәчәк.

Сөекле Пәйгамбәребез (Аллаһның аңа сәламе вә рәхмәте булсын) әйтте: “Кем Рамазан аен ураза тотып, төнге намазлар укып үткәрсә, аның моңарчы кылган гөнаһлары гафу ителәчәк” (Бухари һәм Мөслим риваяте).

Шушы ай килү белән Пәйгамбәребез (Аллаһның аңа сәламе вә рәхмәте булсын) сәхәбәләрен шушы сүзләр белән шатландыра торган була:

Мөбарәк Рамазан ае килде. Бу айда сезгә Аллаһ Тагәлә ураза тотуны фарыз кылды, шушы айда җәннәт ишекләре ачыла, җәһәннәм ишекләре ябыла” (Насаи риваяте).

Әйе, бу айның фазыйләте турында, шулайук Рамазан аенда изгелекләрне күп кылырга өндәүче тагын бик күп хәдисләр бар. Шуңа күрә бу айны бары тик хәерле гамәлләрдә генә үткәрергә тырышыйк, кардәшләрем! Күп итеп Коръән укыйк, Аллаһны күп зикер итик, сәдәкалар бирик, ифтар мәҗлесләре ясыйк, төнге намазлар укыйк, мохтаҗ кардәшләребезгә ярдәм итик! Шушы юлда тырыш булыйк!

Бу гамәлләрне башкарырга Раббыбыз Аллаһ һәрбарчабызга да тәүфыйк бирсә иде. Әмин!

 


  • 0

Рубрика :Нәсихәт

Ният — барча гамәлләрнең дә нигезе булып тора, шуңа да кешенең гамәленең кабул булуы яки булмавы аның ниятенә нигезләнгән. Әгәр дә адәм баласы Аллаһка ихласлык белән,әҗер-савап өмет итеп һәм пәйгамбәребезнең сөннәтенә муафикъ рәвештә нинди дә булса гамәл кыла икән — кабул була иншәАллаһ. Ә кемнең инде нияте Аллаһ ризалыгы өчен булмаса, яки расүлебезнең сөннәтенә туры килмәсә, ул вакытта аның кылган гамәле файдасыз булыр, бәлки гөнаһ кына
өстәр.


  • 0

Рубрика :Нәсихәт

Калеб ул савыт кебек, әгәр ул савыт иман, гыйлем, насыйхәтләр белән тулып, әдәб-әхлак илә зиннәтләнсә, әлбәттә ул савыттан бары тик хәерлелек кенә чыга. Һәм киресенчә, йөрәк шик-шөбһәләр, явызлык, тәкәбберлек белән тулы булса, ул савыттан хәерле нәрсә түгел, бәлки явызлык чыга. Кайбер кешеләр, йөрәк-күңелне, тән белән кыла торган эшләрдән аералар. Әгәр аңа: «Кылма инде бозыклык», — дисәң, ул: «Минем күңелем чиста. Минем изгелегем, минем динем күңелемдә», — ди: «Мин динемне күңелемдә саклыйм, кешегә күрсәтеп йөрмим», — дип тә өстәп куя. Шул ук вакытта, ул бозык эшләр кылып йөри.
Мөхтәрәм кардәшләрем, беркайчан да онытмыйк, кешенең кылган һәр эше, иң әввәл аның калебе белән бәйле. Пәйгамбәребезнең бер сәхәбәсе Әбү Һүрайра безгә калеб турында бик тә хикмәтле сүз әйтеп калдырган: «Йөрәк тәннең патшасы, башка әгъзалар аның гаскәре. Патша гаскәргә ни кушса, гаскәр шуны кыла». Шулай, кардәшләрем, күңел нинди, гамәл шундый. Күңелем чиста минем, дип бозыклык юлында йөрүчеләр, үзләренә бертөрле аклану гына эзлиләр.


  • 0

Рубрика :Нәсихәт

Мөгаз ибн Җәбәл сөйләвенчә: «Без пәйгамбәр белән бер ишәккә утырып бара идек һәм ул миннән: «Мөгаз, бәндәләре өстендә булган Аллаһының хакын һәм бәндәләрнең Аллаһ каршында булган хакларын беләсеңме?» – дип сорады. Мин: «Аллаһ һәм аның илчесе яхшырак белә», – дип җавап бирдем. Пәйгамбәр: «Дөреслектә, бәндәләре өстендәге Аллаһының хакы – Аңа гына гыйбадәт кылу һәм һичкемне Аңа тиңдәш кылмау. Ә бәндәләрнең Аллаһ каршында булган хаклары – һичкемне Үзенә тиңдәш кылмаган бәндәсен газапламавы», — диде.

Бохари һәм Мөслим риваяте.


  • 0

Рубрика :Нәсихәт

📌

Пәйгамбәребезصلى الله عليه ةسلم: “Хатынны, гадәттә, дүрт сыйфатына карап алалар: байлыгы, нәсәбе (ата-анасының халык арасында танылган булуы), матурлыгы һәм дине. Син диненә карап ал, юкса, уңышка ирешә алмассың”, — диде.

📚Бухари риваяте

“Әлбәттә, никахта малга, матурлык вә нәсәпкә (дәрәҗә) карамаска дигән сүз түгел. Шулай да, иң элек диненә игътибарлы вә гыйффәтле(целомудрие) хатынны табарга тырышырга кирәк. Пәйгамбәрнең морады(цель) байлыгын, дәрәҗәсен вә матурлыгын игътибарга алудан тыймыйча, бәлки диндарлыгын алда тоту хакында нәсыйхәт бирү. Бер гарәп шагыйре бу турыда болай дигән: “Су бозылуның сәбәбе — балчыгы бозылу, ир бозылуның сәбәбе — никах бозылу, ягъни, тиешсез хатынга никахлашу”.

🎓Риза Фәхретдин.“Җәвамигулькәлим шәрехе”, 124 хәдис. 1916 ел.

Раббым, хатыннарга ирләренә, ирләргә хатыннарына хәерле җефетләр булып яшәргә насыйп ит.


  • 0

Рубрика :Нәсихәт

«Кешеләр арасында булган барлык дошманлык, усаллык һәм хөсетлекнең асылы — ул үз нәфесеңә иярүдер. Шуңа күрә үз нәфесенә каршы килә алган кеше калебен, тәнен һәм тән әгъзаларын борчымас. Ул кеше үзе дә борчылмас, башкаларны да борчымас».

(«Раудатүл-мөхиббин» китабыннан)


  • 0

Рубрика :Нәсихәт

«Тән чирләре авырулардан була, калеб чирләре — гөнаһлардан. Шуңа күрә, тән чирләгән вакытта ашауда ләззәт татый алмаган кебек, калеб тә, гөнаһларга баткач, гыйбадәт кылуда ләззәт таба алмыйдыр».

(Яхъя ибне Мөгаз)


  • 0

Рубрика :Нәсихәт

📌
Фудайл бин Гыяд әйтә: » Мөэмин мөселман әз сөйли күп эшли, ә монафикъ (ике йөзле) кеше күп сөйли әз эшли.»

📚 Шөгәб әл-Иман Байхакый җыентыгыннан.


  • 0

Рубрика :Нәсихәт

📌

Пәйгамбәребез صلى الله عليه وسلم: “Фәкыйрьлектән, матди һәм рухи мохтаҗлыктан, кеше каршында хур булу вә мәсхәрәгә калудан, кешеләрне җәберләүдән (притеснять) вә башкалар тарафыннан җәберләнүдән Аллаһы Тәгаләгә сыеныгыз (саклавын сорагыз)”, — диде.

📚(Имам Нәсәәий риваяте, сахих хәдис).

“Мохтаҗлык, кеше җәберләү һәм башкалар тарафыннан җәберләнү адәм баласы өчен михнәтле нәрсәләр булганлыктан, Аллаһ илчесе болардан Аллаһка сыенырга боерган.

Мәктәп-мәдрәсәләр, фәкыйрьләрне тәрбияләү, гыйлем тарату, мәдәни вә иҗтимагый хәлләрне төзәтү, дин һәм милләтне саклый алу – һәрберсе байлыкка килеп терәлә. Бу көндә бай булмаган милләт бай булган милләтләргә хезмәт итәргә вә шуның аяклары астында изелергә хөкем ителгән.

Фәкыйрьлек вә мохтаҗлыктан сыену, кул күтәреп дога кылып утырудан бигрәк, мал табу сәбәпләренә керешү вә тырышудан гыйбарәт. Сәбәпләренә керешмичә,  намазлык өстендә дога кылып утырудан гына күп хикмәт чыкмас. Сәбәпләренә керешкән вә маңгай тирләрен агызып йөргәннән соң, намазлык өстендә утырып, Аллаһтан сорау бик яхшы вә бик файдалы булыр. Мал табылу белән генә эш бетми, бәлки аның бәрәкәтле вә файдалы булуы да тиешле. Менә дога кылу шуның өчен бик кирәк”.

🎓Риза Фәхретдин.“Җәвамигулькәлим шәрехе”, 123 хәдис. 1916 ел.

Йә, Раббым, безне фәкыйрьлектән һәм хурлыктан сакла. Кеше җәберләүдән һәм кешеләрнең җәберләүләреннән имин кыл.


Эзләү

Көн нәсихәте

    Динем Ислам

    Дин – ул бу дөньядагы иң изге сыйфатларны сугаручы илаһи бер чишмә. Аллаһ Сүбхәнәһү вә Тәгалә Үзенең динен аерым бер кешенең яки аерым бер гаиләнең, яисә аерым бер җәмгыятьнең генә тормышын  төзәтер өчен түгел, бәлки, барлык халыкларның юлын яктыртучы нур итеп, аларны караңгылыктан яктылыкка чыгару өчен җибәргән.

    БАРЛЫК НӘСИХӘТЛӘР...
Яндекс.Метрика