• 0

Рубрика :Нәсихәт

Аллаһы Тәгалә Коръәндә әйтә: «Мин җен һәм кешеләрне Үземә гыйбадәт кылсыннар өчен генә барлыкка китердем»

(«әз-Зәрийәт» сүрәсе, 56 аять).

Габдеррахман әс-Сәгъди тәфсиреннән:

«Аллаһы Тәгалә ни өчен кешеләр һәм җеннәрне барлыкка китерүен һәм ни өчен аларга шулхәтле пәйгамбәрләр җибәрүен хәбәр итә.

Раббыбыз үзенең бәндәләрен, Аңа гыйбадәт кылсыннар, Аны белсеннәр һәм яратсыннар, Аның рәхмәт-ризалыгына омтылсыннар, боерыкларын үтәсеннәр һәм Аннан башка бүтән иләһләр эзләмәсеннәр өчен барлыкка китерә. Һәм бәндәләр үзләренең яратучысын (бар итүчесен) танып белмичә, алар бу эшләрне башкара алмаячаклар. Бәндәнең гыйбадәт кылуы тулысынча Аллаһы Тәгаләнең сыйфатларын танып белүенең тирәнлегенә бәйле. Һәм Раббысы турында күбрәк белгән саен, ул Аңа яхшырак гыйбадәт кылачак. Нәкъ менә шуның өчен Аллаһы кеше һәм җеннәрне барлыкка китергән дә инде. Ә Аллаһ бәндәләренә моһтаҗ булганга күрә аларны барлыкка китергән, дип уйлаучылар нык ялгышалар.»

Киләсе аятьтә Аллаһы әйтә: «Мин алардан бернинди ризык та һәм мине ашатуларын да теләмим»

(«әз-Зәрийәт» сүрәсе, 57 аять).

Габдеррахман әс-Сәгъди тәфсиреннән:
«Аллаһ беркеем һәм бернәрсәгә дә моһтаҗ түгел, ләкин кешеләр һәм башка мәхлүклар үзләренең эшләрендә Раббылары ярдәменә моһтаҗ».


Эзләү

Көн нәсихәте

    Әти-әниеңә дога кыласынмы?

    Безнең иң кадерле кешеләребез – әти-әниләребез. Алар – бу якты дөньяга килүбезгә сәбәпчеләр. Нәни вакытыбызда, төн йокыларын калдырып, безне бакканнар. Бераз үсә төшкәч, киреләнүләребезгә сабыр итеп, безне  тиешенчә тәрбия кылганнар. Авырып китсәк, көне-төне безнең  өчен   борчылып,  яныбыздан китмичә, дәвалаганнар.  Үзләренә бик авыр булса да, «балам интекмәсен, мохтаҗлык кичермәсен, кеше арасында ким-хур булмасын»  дип, үз авызларыннан өзеп, безне ашатып-эчертеп, өс-башыбызны карап,    башка кирәк-ярак белән тәэмин итеп торганнар…

    Ата-аналарның барысы да үз баласын җил-яңгырмый тидерми кадерләп үстерә.  Балалары өчен  хәерлелек теләп, һидаят-тәүфыйк сорап,  һәрвакыт дога кылырга тырышалар.  Без дә әти-әниләребезгә һәрчак игелек кенә китерик һәм алар  өчен һәрчак изге догада булыйк. Аллаһы тәгаләнең  Коръәнендә  ата-аналарга дога кылырга әмер ителә:

    «Рабби-р ьхәмһүмәә кәмәә раббәйәәнии сагыираа», ягъни,  «И-и, Раббым, алар (ягъни әти-әни) мине кечкенә чагымда мәрхәмәт белән үстергән  кебек, Син дә аларга дөньяда һәм ахирәттә шәфкать кыл!» («Исра» сүрәсе,  24нче аять).

    Әйе, алар безгә дога кылган кебек, без  дә алар өчен һәрвакыт дога кылырга тырышыйк. Әти-әниләребез өчен, бу дөньяда  – бу дөнья яхшылыкларын, ахирәттә  ахирәт яхшылыкларын сорыйк. Әти-әниләребезне догабыздан бер дә калдырмыйк!   Югарыда китерелгән шушы доганы да ятлап, шул дога сүзләре белән дә Раббыбызга ялварыйк.

    БАРЛЫК НӘСИХӘТЛӘР...
Яндекс.Метрика